رپورٹ: واجد قریشیؔ (ڈنمارک)
لزبن (پرتگال): پرتگال کے دارالحکومت لزبن میں اقوامِ متحدہ کے نظام، عالمی امن، انسانی حقوق، پائیدار ترقی اور عالمی حکمرانی جیسے اہم موضوعات پر ACUNS (Academic Council on the United Nations System) کی سالانہ بین الاقوامی کانفرنس یکم تا 3 جولائی منعقد ہو رہی ہے۔ اس باوقار عالمی کانفرنس میں دنیا بھر سے ممتاز ماہرینِ تعلیم، محققین، اقوامِ متحدہ کے عہدیداران، پالیسی سازوں اور بین الاقوامی اداروں کے نمائندگان شریک ہیں، جہاں عالمی چیلنجز، بین الاقوامی تعاون، مؤثر عالمی حکمرانی اور مستقبل کی پالیسی سازی سے متعلق اہم علمی و فکری مباحث جاری ہیں۔
پاکستان کے لیے یہ ایک قابلِ فخر اعزاز ہے کہ منہاج القرآن انٹرنیشنل کا خصوصی وفد منتظمین کی خصوصی دعوت پر اس عالمی کانفرنس میں شرکت کر رہا ہے۔ یہ شرکت منہاج القرآن انٹرنیشنل کی علمی، فکری، تحقیقی اور امن کے فروغ کے لیے گراں قدر خدمات پر عالمی اعتماد اور اعتراف کا واضح اظہار ہے، جو تنظیم کے بین الاقوامی کردار اور پاکستان کے مثبت، معتدل اور تعمیری تشخص کو عالمی سطح پر مزید اجاگر کرنے کا مؤثر ذریعہ بن رہی ہے۔
کانفرنس میں منہاج یونیورسٹی لاہور کی نمائندگی پروفیسر ڈاکٹر خرم شہزاد اپنے وفد کے ہمراہ کر رہے ہیں، جبکہ منہاج القرآن انٹرنیشنل، منہاج یورپین کونسل اور منہاج پبلک ریلیشنز فورم کے نمائندگان ڈاکٹر حمزہ انصاری اور عمر مرزا کی سربراہی میں یورپ کے مختلف ممالک سے شریک وفود کے ساتھ اس عالمی فورم میں بھرپور اور مؤثر نمائندگی کر رہے ہیں، جو تنظیم کے مضبوط بین الاقوامی روابط اور فعال عالمی کردار کی عکاس ہے۔
منہاج القرآن انٹرنیشنل کا وفد مختلف علمی سیشنز، پینل مباحثوں اور بین الاقوامی مکالموں میں فعال کردار ادا کرتے ہوئے عالمی امن، بین المذاہب و بین الثقافتی ہم آہنگی، انسدادِ انتہاپسندی، انسانی حقوق، نوجوانوں کی مثبت کردار سازی اور پائیدار ترقی جیسے اہم موضوعات پر تنظیم کے علمی و تحقیقی مؤقف، عملی تجربات اور خدمات کو عالمی برادری کے سامنے پیش کرے گا۔ اس شرکت سے منہاج القرآن انٹرنیشنل کے عالمی روابط مزید مستحکم ہوں گے، جبکہ عالمی جامعات، تحقیقی مراکز اور بین الاقوامی اداروں کے ساتھ علمی و تحقیقی تعاون، مشترکہ منصوبوں اور ادارہ جاتی شراکت داری کے نئے مواقع بھی پیدا ہوں گے۔
توقع ہے کہ اس عالمی فورم پر ہونے والے روابط اور علمی تبادلۂ خیال سے تنظیم کے بین الاقوامی نیٹ ورک کو مزید وسعت ملے گی، اس کی علمی و فکری خدمات کو عالمی سطح پر نئی پذیرائی حاصل ہوگی، اور امن، اعتدال، بین المذاہب ہم آہنگی اور انسانی فلاح کے فروغ کے لیے منہاج القرآن انٹرنیشنل کی کاوشوں کو مزید تقویت ملے گی۔
