فرانس میں پاکستانی سفیر ممتاز زہرا بلوچ نے دفاع اور سلامتی کی زمینی و فضائی صنعت سے متعلق دنیا کی معروف نمائش یوروسیٹری 2026 (Eurosatory 2026) میں پاکستان پویلین کا افتتاح کیا۔
اس موقع پر انہیں نمائش میں پیش کردہ منصوبے اور پاکستان کے دفاع و سلامتی کے شعبے میں اس کےاہم کردار کے بارے میں بریفنگ دی گئی۔ بعد ازاں سفیر ممتاز زہرا بلوچ نے مختلف ممالک کے پویلینز کا دورہ کیا اور بڑی دفاعی صنعتوں کے نمائندوں سے باہمی دلچسپی کے امور پر تبادلہ خیال کیا۔
15 سے 19 جون تک منعقد ہونے والی یوروسیٹری 2026 دنیا کی سب سے بڑی زمینی دفاع اور سیکیورٹی نمائشوں میں شمار کی جا رہی ہے۔ اس عالمی نمائش میں ہزاروں دفاعی ماہرین، فوجی حکام، سرکاری وفود اور دفاعی کمپنیاں شریک ہیں۔
نمائش میں جدید بکتر بند گاڑیاں، فضائی دفاعی نظام، نگرانی کے آلات، سائبر سیکیورٹی پلیٹ فارمز اور مصنوعی ذہانت پر مبنی عسکری نظام پیش کیے جا رہے ہیں۔ یورپی دفاعی صنعت کے ساتھ ساتھ ایشیائی اور مشرق وسطیٰ کی بڑی دفاعی کمپنیاں بھی اپنی جدید مصنوعات کی نمائش کر رہی ہیں
