فرانس کے شہر تولوز میں عید کے موقع پر پاکستانی کمیونٹی کے زیرِ اہتمام ایک پُروقار اور رنگا رنگ تقریب کا انعقاد کیا گیا، جس میں سفیرِ پاکستان برائے فرانس ممتاز زہرہ بلوچ نے خصوصی شرکت کی۔ تقریب میں پاکستانی نژاد افراد اور خاندانوں کی بڑی تعداد نے شرکت کی اور عید کی خوشیوں کو مل جل کر منایا۔
اس موقع پر خطاب کرتے ہوئے سفیرِ پاکستان ممتاز زہرہ بلوچ نے فرانسیسی معاشرے میں پاکستانی کمیونٹی کی مثبت اور قابلِ قدر خدمات کو سراہا۔ انہوں نے کہا کہ فرانس میں مقیم پاکستانی نہ صرف اپنی محنت، قابلیت اور دیانت داری کے ذریعے پاکستان کا مثبت تشخص اجاگر کر رہے ہیں بلکہ پاکستان اور فرانس کے درمیان دوستی اور باہمی تعلقات کو بھی مزید مستحکم بنانے میں اہم کردار ادا کر رہے ہیں۔
سفیرِ پاکستان نے عید کے پیغام پر روشنی ڈالتے ہوئے اتحاد، بھائی چارے، ہمدردی اور باہمی احترام کو فروغ دینے کی ضرورت پر زور دیا۔ انہوں نے کہا کہ عید کا اصل پیغام محبت، یکجہتی اور ضرورت مندوں کے ساتھ خوشیاں بانٹنے میں مضمر ہے۔
تقریب کے دوران شرکاء کے درمیان خوشگوار ملاقاتوں، ثقافتی سرگرمیوں اور عید کی روایتی خوشیوں نے سماں باندھ دیا۔ اس موقع پر پاکستانی ثقافت کی جھلک نمایاں رہی اور کمیونٹی کے افراد نے ایک دوسرے کے ساتھ عید کی خوشیاں بانٹتے ہوئے اپنے قومی و ثقافتی رشتوں کو مزید مضبوط بنایا۔
تقریب نے فرانس میں مقیم پاکستانیوں کے درمیان اتحاد، باہمی تعاون اور قومی یکجہتی کے جذبے کو اجاگر کیا اور دنیا بھر میں پاکستانی ثقافتی روایات کے فروغ کی ایک خوبصورت مثال کی .
