فرانس میں تعینات سفیر پاکستان ممتاز زہرا بلوچ نے Dr. Aurore Didier کے اعزاز میں ایک خصوصی تقریب کا اہتمام کیا، جنہیں آثارِ قدیمہ کے شعبے میں نمایاں خدمات اور پاکستان و فرانس کے درمیان ثقافتی تعاون کے فروغ میں اہم کردار ادا کرنے پر پاکستان کے سول اعزاز “تمغۂ پاکستان” سے نوازا گیا۔
سفیر پاکستان ممتاز زہرا بلوچ نے نے صدرِ پاکستان کی جانب سے یہ اعزاز ڈاکٹر دیدیے کو پیش کیا۔ تقریب میں سفارتی عملے کے ارکان، فرانسیسی ماہرینِ آثارِ قدیمہ و اسکالرز، ثقافتی اداروں کے نمائندگان، میڈیا سے وابستہ افراد اور پاکستان کے دوستوں نے شرکت کی۔
مہمانوں کا خیرمقدم کرتے ہوئے ممتاز زہرہ بلوچ نے ڈاکٹر دیدیے کو اس باوقار اعزاز پر مبارکباد پیش کی اور پاکستان کے شاندار آثارِ قدیمہ کے ورثے، خصوصاً وادیٔ سندھ کی تہذیب کے تحفظ اور فروغ کے لیے ان کی گراں قدر خدمات کو سراہا۔ سفیر نے آثارِ قدیمہ کے میدان میں پاکستان اور فرانس کے درمیان دیرینہ تعاون کو اجاگر کیا اور اس بات پر زور دیا کہ ڈاکٹر دیدیے اور دیگر فرانسیسی ماہرینِ آثارِ قدیمہ نے دونوں ممالک کے درمیان ثقافتی اور علمی تعلقات کو مضبوط بنانے میں اہم کردار ادا کیا ہے۔
اس موقع پر خطاب کرتے ہوئے ڈاکٹر دیدیے نے حکومتِ پاکستان کا شکریہ ادا کیا کہ انہیں اس اعزاز سے نوازا گیا، اور پاکستانی اداروں و محققین کے ساتھ تعاون جاری رکھنے کے عزم کا اعادہ کیا۔ انہوں نے کہا کہ پاکستان کا آثارِ قدیمہ کا ورثہ عالمی تہذیب میں ایک منفرد مقام رکھتا ہے، اور اس کے تحفظ اور عالمی سطح پر فروغ کے لیے مشترکہ کوششیں نہایت اہم ہیں۔
تقریب کے اختتام پر ڈاکٹر اورور دیدیے کے اعزاز میں استقبالیہ دیا گیا۔
