سفارتِ پاکستان، پیرس میں “معرکۂ حق” کا ایک سال مکمل ہونے پر ایک پروقار تقریب کا انعقاد کیا گیا
جس میں پاکستانی و فرانسیسی کمیونٹی کے مختلف طبقات، سفارتخانے کے حکام اور میڈیا نمائندگان نے شرکت کی۔
اس موقع پر صدرِ پاکستان، وزیرِ اعظم پاکستان اور نائب وزیرِ اعظم/وزیرِ خارجہ کے خصوصی پیغامات پڑھ کر سنائے گئے۔
تقریب سے خطاب کرتے ہوئے فرانس میں پاکستان کی سفیرممتاز زہرہ بلوچ نےبھارتی جارحیت کے خلاف پاکستان کی شاندار کامیابیوں اور عسکری، سفارتی اور بیانیاتی محاذوں پر اس کی غیر معمولی صلاحیتوں کا ذکر کیا۔ انہوں نے کہا کہ پاکستان کی بہادر مسلح افواج نے پوری دنیا کو یہ واضح پیغام دیا کہ پاکستان ہر قسم کے خطرات کے خلاف اپنے دفاع کے لیے مکمل عزم رکھتا ہے۔ سفیر نے مزید کہا کہ پاکستانی ایک بہادر اور امن پسند قوم ہیں، جنہیں کوئی جارح قوت مرعوب نہیں کر سکتی۔
سفیر ممتاز زہرہ بلوچ نے دنیا بھر میں تعینات پاکستانی سفارتکاروں کی خدمات کو بھی سراہا، جنہوں نے بھارت کی بلااشتعال جارحیت اور پاکستان کے امن و سفارتکاری سے وابستہ عزم کو مؤثر انداز میں اجاگر کیا۔ انہوں نے یہ بھی کہا کہ پاکستان نے بروقت اور حقائق پر مبنی معلومات کی فراہمی کے ذریعے بھارتی پروپیگنڈے کو مؤثر انداز میں ناکام بنایا۔ انہوں نے پاکستانی اور فرانسیسی میڈیا کی معروضی رپورٹنگ کو بھی سراہا اور کہا کہ انہوں نے بھارتی میڈیا کی اشتعال انگیز اور غیر ذمہ دارانہ رپورٹنگ سے خود کو ممتاز رکھا۔
سفیر بلوچ نے سندھ طاس معاہدے کی بھارت کی جانب سے معطلی کی بھی شدید مذمت کی اور کہا کہ یہ اقدام پاکستان کی آبی اور غذائی سلامتی پر حملے کے مترادف ہے۔ پانی کو بطور ہتھیار استعمال کرنا بین الاقوامی قوانین سے بھارت کی مکمل بے اعتنائی کا ایک اور ثبوت ہے۔
سفارتخانے کا ہال “پاکستان زندہ باد” اور “پاک افواج پائندہ باد” کے نعروں سے گونج اٹھا۔ تقریب کا اختتام پاکستان کے امن، استحکام اور مسلسل ترقی و خوشحالی کے لیے خصوصی دعا کے ساتھ ہوا۔
