معرکۂ حق — یومِ تشکر
پاکستان زندہ باد
رپورٹ: واجد قریشیؔ (ڈنمارک)
ڈنمارک میں واقع پاکستان ایمبیسی میں “معرکۂ حق” کے عنوان سے ایک شاندار، پروقار اور جذبۂ حب الوطنی سے بھرپور تقریب کا انعقاد کیا گیا، جس میں ڈنمارک بھر سے پاکستانی کمیونٹی نے بھرپور جوش و خروش کے ساتھ شرکت کی۔ خواتین، مردوں اور نوجوانوں کی بڑی تعداد نے وطنِ عزیز پاکستان اور اپنی بہادر افواجِ پاکستان سے والہانہ محبت، بھرپور یکجہتی اور قومی جذبے کا فقیدالمثال مظاہرہ کیا۔
تقریب کا آغاز نہایت پُرجوش، قومی ولولے اور حب الوطنی سے سرشار ماحول میں ہوا، جہاں شرکاء نے پاکستان کی سلامتی، ترقی، خوشحالی اور استحکام کیلئے خصوصی دعائیں کیں۔ مقررین نے اپنے خطابات میں پاک افواج کی عظیم قربانیوں، بے مثال بہادری اور دفاعِ وطن کیلئے دی جانے والی لازوال خدمات کو زبردست خراجِ تحسین پیش کرتے ہوئے کہا کہ پاکستانی افواج قوم کا فخر اور ملکی سلامتی کی مضبوط علامت ہے۔
تقریب سے خطاب کرتے ہوئے سید اعجاز شاہ بخاری، سکندر صدیق، ولایت خان، عباس رضوی، شعیب سرور، میاں منیر، محمد اکرم جوڑا، راجہ غفور افضل، میاں منشا اور راجہ فرہاد نے اس عزم کا اظہار کیا کہ پاکستانی قوم ہر آزمائش اور مشکل گھڑی میں اپنی بہادر افواج کے شانہ بشانہ کھڑی ہے۔ مقررین نے کہا کہ قومی اتحاد، یکجہتی اور حب الوطنی ہی پاکستان کی اصل طاقت ہیں، جن کی بدولت ملک ہر چیلنج کا مقابلہ کرنے کی صلاحیت رکھتا ہے۔ انہوں نے پاکستان ایمبیسی ڈنمارک کو اس شاندار، منظم اور یادگار تقریب کے کامیاب انعقاد پر دلی مبارکباد پیش کرتے ہوئے اسے بیرونِ ملک پاکستانیوں کے قومی جذبے اور یکجہتی کی خوبصورت مثال قرار دیا۔
اس خصوصی تقریب سے قبل پاکستان سوسائٹی ڈنمارک کے زیرِ اہتمام ایک شاندار اور جذبۂ حب الوطنی سے بھرپور کار ریلی کا انعقاد کیا گیا، جس میں درجنوں گاڑیوں پر مشتمل قافلہ پاکستانی پرچم لہراتے ہوئے ڈنمارک کی سڑکوں پر وطن سے محبت، قومی یکجہتی اور پاک افواج سے والہانہ عقیدت کا پیغام دیتا رہا۔ ریلی کے شرکاء نے “پاکستان زندہ باد” اور “پاک فوج زندہ باد” کے فلک شگاف نعرے بلند کیے، جبکہ قومی ترانوں اور پرجوش نعروں سے پورا ماحول حب الوطنی کے رنگ میں رنگ گیا۔
تقریب میں پاکستان کے سفیر نے شرکاء سے خصوصی اور پُرجوش خطاب کرتے ہوئے “معرکۂ حق” کی اہمیت، اس دن کی تاریخی حیثیت اور قومی یکجہتی کے پیغام پر تفصیلی روشنی ڈالی۔ انہوں نے کہا کہ پاکستانی افواج نے ہر دور میں دشمن کے ناپاک عزائم کو ناکام بناتے ہوئے اپنی پیشہ ورانہ مہارت، جرات اور بے مثال قربانیوں سے نہ صرف وطنِ عزیز کا دفاع یقینی بنایا بلکہ عالمی سطح پر پاکستان کا وقار بھی بلند کیا۔
انہوں نے بیرونِ ملک مقیم پاکستانیوں، خصوصاً نوجوان نسل پر زور دیا کہ وہ اپنی افواج پر مکمل اعتماد رکھیں، اتحاد، صبر اور مثبت سوچ کے ساتھ آگے بڑھتے رہیں کیونکہ کامیابی ہمیشہ حق، سچ اور ثابت قدمی کا مقدر بنتی ہے۔ سفیرِ پاکستان نے اس عزم کا بھی اظہار کیا کہ دنیا بھر میں مقیم پاکستانی ملک کی ترقی، سلامتی اور خوشحالی کیلئے متحد اور پُرعزم ہیں۔
تقریب کے اختتام پر “یومِ تشکر” کا خصوصی کیک کاٹا گیا، جبکہ شرکاء میں پرتکلف کھانا اور کیک بھی تقسیم کیا گیا۔ اس موقع پر شرکاء نے ایک دوسرے کے ساتھ خوشی اور قومی یکجہتی کے جذبات کا اظہار کیا۔ حاضرین نے اس پروقار تقریب کو بیرونِ ملک پاکستانی کمیونٹی کے اتحاد، حب الوطنی، قومی یکجہتی اور پاک افواج سے والہانہ محبت کی ایک خوبصورت اور یادگار مثال قرار دیتے ہوئے اس کے کامیاب انعقاد کو سراہا۔
رپورٹ: واجد قریشیؔ (ڈنمارک)
