فرانس میں پاکستان کی سفیر محترمہ ممتاز زہرہ بلوچ نے روٹری کلب آف پیرس کے زیرِ اہتمام منعقدہ ایک کانفرنس سے کلیدی خطاب کرتے ہوئے کہا ہے کہ پاکستان بدلتی ہوئی عالمی صورتحال میں کثیرالجہتی نظام، بین الاقوامی قانون اور تنازعات کے پُرامن حل کے لیے اپنے پائیدار عزم پر قائم ہے۔
پاکستان ایک بدلتی ہوئی دنیا میں” کے موضوع پر خطاب کرتے ہوئے سفیرِ پاکستان نے تیزی سے تبدیل ہوتے عالمی نظام میں پاکستان کے مؤقف اور کردار کا جامع جائزہ پیش کیا۔ انہوں نے کہا کہ پاکستان جنوبی ایشیا، وسطی ایشیا اور مشرقِ وسطیٰ کے سنگم پر واقع ہونے کے باعث غیر معمولی جغرافیائی اہمیت کا حامل ہے۔
سفیر ممتاز زہرہ بلوچ نے اس بات پر زور دیا کہ موجودہ دور میں، جب دنیا کو دہشت گردی، موسمیاتی تبدیلی اور معاشی عدم استحکام جیسے پیچیدہ چیلنجز کا سامنا ہے، تو مکالمہ اور سفارت کاری محض ترجیح نہیں بلکہ ناگزیر ضرورت بن چکے ہیں۔
انہوں نے بحرانوں کے خاتمے اور کشیدگی میں کمی کے لیے پاکستان کے مثبت کردار اور اقوام متحدہ کے امن مشنز میں اس کی فعال شرکت کو اجاگر کیا۔ انہوں نے شرکاء کو مشرقِ وسطیٰ کی موجودہ صورتحال میں پاکستان کے ثالثی کردار سے بھی آگاہ کیا اور اس عزم کا اعادہ کیا کہ پاکستان امن کے قیام اور مذاکرات کے فروغ کے لیے ہر ممکن تعمیری کردار ادا کرنے کے لیے تیار ہے۔
سفیرِ پاکستان نے ملک کی قدیم تہذیبی وراثت، نوجوان اور متحرک آبادی، اور معاشی ترقی کے امکانات پر بھی روشنی ڈالی۔ انہوں نے کہا کہ پاکستان میں جاری اصلاحاتی ایجنڈا فرانس اور یورپی برادری کے ساتھ تجارت اور سرمایہ کاری کے وسیع مواقع فراہم کرتا ہے۔
یہ تقریب روٹری کلب آف پیرس کے اراکین کے علاوہ پیرس میں موجود سفارتی، کاروباری اور سماجی حلقوں کی ممتاز شخصیات کی شرکت سے منعقدہوئی۔
