ویلئرز لابیل (فرانس): فرانس کے شہر Villiers-le-Bel کے بلدیاتی انتخابات میں پاکستانی نژاد نوجوان رہنما زوہیب مقصود نے ڈپٹی میئر کے امیدوار کے طور پر انتخابی مہم کا باقاعدہ آغاز کر دیا ہے۔ وہ فرانسیسی رکنِ قومی اسمبلی Carlos Martens Bilongo کی ٹیم کے ساتھ انتخابی میدان میں ہیں۔
زوہیب مقصود نے کہا ہے کہ فرانس کی سیاست میں پاکستانی نوجوانوں کی فعال شمولیت نہ صرف وقت کی ضرورت ہے بلکہ یہ پاکستانی کمیونٹی کے روشن مستقبل کے لیے بھی انتہائی اہم ہے۔ ان کا کہنا تھا کہ وہ بلدیاتی سطح پر کمیونٹی کے مسائل کے حل کے لیے بھرپور کردار ادا کریں گے اور ان حقوق کے حصول کے لیے عملی اقدامات کریں گے جن سے کمیونٹی عرصہ دراز سے محروم ہے۔
انہوں نے بتایا کہ ان کا انتخابی منشور وسیع اور جامع ہے، تاہم ابتدائی طور پر 14 نکاتی ایجنڈے پر کام کیا جائے گا جس کا مقصد کمیونٹی کی روزمرہ زندگی میں مثبت اور عملی تبدیلی لانا ہے۔ اس ایجنڈے میں تعلیم، صحت اور میونسپل سروسز سے متعلق بنیادی اقدامات کو ترجیح دی جائے گی۔
زوہیب مقصود کے مطابق ان کی ٹیم مقامی سطح پر سماجی ہم آہنگی، نوجوانوں کی رہنمائی، بہتر شہری سہولیات اور شفاف انتظامی امور کے فروغ کے لیے کام کرے گی۔ انہوں نے پاکستانی کمیونٹی سے اپیل کی کہ وہ سیاسی عمل میں بھرپور شرکت کرتے ہوئے اپنی نمائندگی کو مضبوط بنائیں۔
