پاکستان بزنس فورم فرانس کے عہدیدران کی جانب سے ایک خط بنام وزیرِ اعظم پاکستان اور وفاقی وزیر برائے اوورسیز چوہدری سالک حسین کو ارسال کیا گیا جس پر چوہدری سالک کا پاکستان بزنس فورم فرانس کے عہداران کے ساتھ رابطہ کیا اور فوری عمل درآمد کی یقین دہانی کروائی گئی۔
السلام علیکم !
محترم جناب چوہدری سالک حسین صاحب وفاقی وزیر برائے اوور سیز پاکستانیز
محترم وفاقی وزیر برائے اوور سیز پاکستانیز ، آپ کی فوری توجہ کی ضرورت ہے، اوور سیز پاکستانیوں کو اپنے پاکستانی پاسپورٹس سے متعلق در پیش مسائل اور سخت ترین مشکلات کی طرف متوجہ کرنا ہے۔ اٹلی، یونان، پرتگال و دیگر کئی ممالک میں بسنے والے اوور سیز پاکستانیوں کو پاکستانی ائیر پورٹ پر نا جائز تنگ کیا جارہا ہے ، اور پاسپورٹس بلاک کے دعوے کے ساتھ لاکھوں روپے رشوت بٹوری جارہی ہے ، ایک خبر کے مطابق حکومت پاکستان کی جانب سے ہزاروں اوور سیز پاکستانیوں کے پاسپورٹوں کو بلاک کر دیا گیا ہے، یہ جس بھی پالیسی کے تحت کیا گیا ہو لیکن اس کا سو فیصد فائدہ ائیر پورٹس پر موجود کر پٹ عملہ اٹھا رہا ہے۔ اس فیصلے کی آڑ میں تقریبا ہر اوور سیز پاکستانی کو ائیر پورٹ پر سخت تنگ کرنے اور چار سے پانچ لاکھ کی رشوت لینے کا ایک نیا طریقہ واردات سامنے آچکا ہے۔ وطن عزیز سے واپسی پر اوور سیز پاکستانی جب ائیر چوٹ پہنچتے ہیں تو حیلے بہانوں سے ان کو مجبور کیا جاتا ہے ، کہ وہ ائیر پورٹ انتظامیہ کو لاکھوں روپے رشوت دیں ورنہ ان کی دستاویزات کی انکوائری آنے تک ان کی فلائیٹ بھی میں ہو جائے گی، اور ان کا سفر کا پروگرام بھی متاثر ہو گا، اوور سیز پاکستانیوں خصوصا یورپ میں مقیم تارکین وطن میں اس حوالے سے سخت تشویش پائی جاتی ہے۔
گزارش ہے کہ ابھی پی آئی اے کی پروازوں کی بحالی کی خوشی اوور سیز پاکستانیوں نے مکمل طور منائی نہیں تھی کہ اوور سیز پاکستانیوں کے لئے یہ ایک نیا مسئلہ سامنے آگیا ہے۔ آپ سے مودبانہ التماس ہے کہ اوور سیز پاکستانیوں کو در پیش اس اہم مسئلے کے حوالے سے متعلقہ اداروں کو فوری ہدایات جاری کی جائیں، اور اوور سیز پاکستانیوں کا یہ مسئلہ حل کر کے ان کا حکومت پر اعتماد بحال کیا جائے،
بہت شکریہ
محمد ابراہیم ڈار
سر پرست اعلی پاکستان بزنس فورم فرانس
سردار ظهور اقبال
چیئر مین پاکستان بزنس فورم فرانس
حاجی محمد اسلم چوہدری
صدر پاکستان بزنس فورم فرانس
پاکستان بزنس فورم فرانس کے عہدیدران و ممبران کی فائل فوٹو
