ایلون مسک نے ٹوئٹر کا مقبول ترین لوگو اچانک تبدیل کردیا۔ اب آپ ٹوئٹر کھولیں گے تو آپ کو نیلی چڑیا کی جگہ ایک کتے کی شکل نظر آئے گی۔ ٹوئٹر پر اس حوالے سے خود ایلون مسک نے ایک تصویر کے ساتھ ٹوئٹ کرتے ہوئے یہ اعلان کیا کہ جیسا کہ وعدہ کیا تھا، میں نے اپنا وعدہ پورا کیا۔ ٹوئٹ میں دیکھا جاسکتا ہے کہ ایلون مسک نے گزشتہ دنوں ایک نئے سوشل میڈیا پلیٹ فارم کی ضرورت کے حوالے سے سوال کیا تھا جس پر ایک ٹوئٹر صارف نے نئے پلیٹ فارم کی جگہ ٹوئٹر کا لوگو تبدیل کرنے کا مطالبہ کیا، جس پر ایلون مسک نے اس سے وعدہ کرلیا تھا۔
تاہم اب ٹوئٹر کے سربراہ ایلون مسک نے ٹوئٹر صارف سے کیا گیا وعدہ پورا کرتے ہوئے سوشل میڈیا پلیٹ فارم کا لوگو تبدیل کر دیا ہے۔
دوسری جانب ایلون مسک کی جانب سے ٹوئٹر کے لوگو تبدیل کئے جانے کے کچھ ہی لمحوں بعد ’ڈوگی کوائن‘ نامی کرپٹو کرنسی کی قیمت میں تیزی سے اضافہ دیکھنے میں آ رہا ہے۔ٹوئٹر لوگو کی تبدیلی سے ڈوگی کوائن کی قدر میں 30 فیصد اضافہ ہوا اور ایک کوائن 0.094 ڈالر کا ہوگیا۔
ایلون مسک کی جانب سے یہ اس وقت کیا گیا جب ان کے خلاف ڈوگی کوائن کے حوالے سے ایک مقدمہ دائر ہے۔ جون 2022 میں ایلون مسک کے خلاف ڈوگی کوائن میں سرمایہ لگانے والے افراد نے 285 ارب ڈالرز ہرجانے کا دعویٰ دائر کیا تھا۔ ان افراد کا مؤقف تھا کہ ایلون مسک 2019 سے جانتے تھے کہ اس کرپٹو کرنسی کی کوئی اہمیت نہیں مگر وہ اپنی تجارت کے لیے اسے پروموٹ کرتے رہے۔
تاہم کچھ ٹوئٹر صارفین کی جانب سے قیاس آرائیاں کی جا رہی ہیں کہ یہ ایلون مسک کی جانب سے ’اپریل فول‘ کا ایک مذاق ہے جو 2 روز بعد کیا جا رہا ہے اور جلد ہی ٹوئٹ کی نیلی چڑیا والا لوگو واپس بحال کردیا جائے گا۔ خیال رہے کہ دنیا کے امیر ترین انسانوں میں سے ایک اور مشہور گاڑی ساز کمپنی ٹیسلا کے مالک ایلون مسک نے مشہور سماجی رابطوں کی ویب سائٹ ٹویٹر کو خرید لیا ہے، جب سے ٹویٹر ان کی ملکیت میں آیا ہے، اس میں کئی تبدیلیاں بھی کی گئی ہیں اور نئی پالیسیز بھی بنائی گئی ہیں، ٹویٹر کے لوگومیں تبدیلی اسی سلسلے کی ایک کڑی ہے۔
