لالہ موسیٰ (محمد کامران )ماہ رمضان المبارک کے دوران گرانفروشوں کے خلاف کریک ڈاؤن کے دوران 69گرانفروشوں کے خلاف مقدمات درج کرائے گئے ہیں، 826گرانفروشوں پر مجموعی طور پر 18لاکھ35ہزار روپے جرمانہ عائد کیا گیا ہے، مصنوعی مہنگائی کی روک تھام کیلئے باقاعدگی سے سبزی و فروٹ منڈیوں کی نگرانی کی جارہی ہے، یہ تفصیلات ڈپٹی کمشنر سیف انور جپہ کی زیر صدارت اجلاس میں بتائی گئیں، ڈی او انڈسٹریز ڈاکٹر اکرام الحق نے بریفنگ دی۔ اجلاس کو بتایا گیا کہ ماہ رمضان المبارک کے دوران پرائس مجسٹریٹس نے مجموعی طور پر 2601انسپکشن کیں اس دوران 885دکاندار ریٹ لسٹیں آویزاں نہ کرنے، مقررہ قیمتوں سے زائد وصول کرنے کے مرتکب پائے گئے جن کے خلاف فوری کاروائی عمل میں لائی گئی۔ اجلاس میں بتایا گیا کہ یکم رمضان المبارک سے ضلع کے تمام دس رمضان بازاروں میں 65روپے کلو کے ریٹ پر 372.631میٹرک ٹن چینی فروخت کی جاچکی ہے جبکہ 375روپے فی دس کلو گرام کے ریٹ پر10کلو گرام آٹے کے 26671تھیلے فروخت کئے جاچکے ہیں۔
