ماسکو(ویب نیوز) روس کی وزارت خارجہ نے دھمکی دیتے ہوئے کہاہے کہ یوکرینی فوج کو مہلک ہتھیار اور فیول فراہم کرنے والے یورپی یونین کے شہری اور ڈھانچےیوکرین میں جاری خصوصی ملٹری آپریشن کے تناظر میں اس طرح کے اقدامات کے نتائج کے ذمہ دار ہوں گے ۔
ڈیلی میل کی رپورٹ کے مطابق روس کی وزارت خارجہ کی جانب سے جاری کر دہ بیان میں کہا گیاہے کہ ’’ وہ ان اقدامات کی صورت میں پیدا ہونے والے نتائج کے خطرے کی سنگینی کو سمجھنے میں غلطی نہیں کر سکتے ۔‘‘
ترجمان کا کہناتھا کہ لگائی جانے والی پابندیاں ’’ بین الاقوامی قوانین کے تحت ناجائز‘‘ ہیں اور مقصد صرف روس کو زیادہ سے زیادہ نقصان پہنچانا ہے ۔یورپی یونین کے اقدامات پر جواب دیا جائے گا ۔
ان کا کہناتھا کہ روس پابندیوں اور دھمکیوں کو خاطر میں لائے بغیر اپنے قومی مفاد کے حصول کو یقینی بنانا جاری رکھے گا ۔ترجمان کا کہناتھا کہ مغربی ممالک کو اب یہ سمجھ لینا چاہیے کہ ان کا عالمی معیشت میں غیر منقسم غلبہ ماضی کی بات ہے ۔
ڈیلی میل نے اپنی رپورٹ میں ’’ دی سن ‘‘ کا حوالہ دیتے ہوئے کہاہے کہ یوکرینی صدر زیلنسکی اپنے عالمی رہنماوں سے رابطوں کے دوران ملٹری ہتھیار دینے کا مطالبہ کیاہے اور اسے یوکرین میں لانے کیلئے کام کر رہے ہیں۔
رپورٹ کے مطابق برطانوی وزیراعظم بورس جانسن نے جواب دیا کہ ہتھیاروں کی تازہ کھیپ دنوں اور گھنٹوں میں پولینڈ بھیج دی جائے گی ۔
