لاہورمیں دو غیر ملکی خواتین کے اغوا اور مبینہ زیادتی کیس میں نائب وزیراعظم اسحاق ڈار کے رشتہ دار سمیت 5 افراد کے خلاف مقدمہ
لاہور کے تھانہ ڈیفنس سی میں دو غیر ملکی خواتین کی درخواست پر نائب وزیراعظم و وزیر خارجہ اسحاق ڈار کے ایک رشتہ دار محمد رضا ڈار سمیت پانچ افراد کے خلاف اغوا، مبینہ اجتماعی زیادتی اور تاوان طلب کرنے کے الزامات کے تحت مقدمہ درج کر لیا گیا ہے۔ پولیس کے مطابق متاثرہ خواتین نے مجسٹریٹ کے سامنے ضابطہ فوجداری کی دفعہ 164 کے تحت اپنے بیانات بھی ریکارڈ کرا دیے ہیں۔
ایف آئی آر کے مطابق متاثرہ خواتین کا دعویٰ ہے کہ انہیں پاکستان آنے کے بعد مبینہ طور پر اغوا کر کے حراست میں رکھا گیا، ان سے رقم طلب کی گئی اور ان کے ساتھ زیادتی کی گئی۔ پولیس نے مقدمہ درج کرنے کے بعد تفتیش کا دائرہ وسیع کرتے ہوئے معاملہ انویسٹی گیشن ونگ کے سپرد کر دیا ہے۔
پولیس حکام کا کہنا ہے کہ کیس کی تحقیقات جاری ہیں اور تمام شواہد کی روشنی میں کارروائی کی جائے گی۔
