فرانس کی بندرگاہی شہر Bordeaux میں برطانوی کروز شپ “Ambition” پر نورو وائرس کے پھیلاؤ کے بعد 1,233 مسافروں اور 514 عملے کے ارکان کو احتیاطی طور پر جہاز تک محدود کردیا گیا۔ فرانسیسی حکام کے مطابق متعدد افراد میں معدے کی بیماری، الٹی اور اسہال جیسی علامات سامنے آئیں۔
بین الاقوامی خبر رساں اداروں Reuters اور Associated Press کے مطابق لیبارٹری ٹیسٹ میں نورو وائرس کی تصدیق ہوئی ہے، تاہم اب تک کوئی سنگین کیس رپورٹ نہیں ہوا۔ حکام نے متاثرہ افراد کو جہاز پر ہی طبی سہولیات فراہم کرنے کی تصدیق کی ہے۔
کروز شپ انتظامیہ کا کہنا ہے کہ متاثرہ مسافروں کو الگ رکھا گیا ہے جبکہ صفائی اور احتیاطی اقدامات مزید سخت کردیے گئے ہیں۔
ماہرین صحت کے مطابق نورو وائرس بند ماحول، خصوصاً کروز شپ جیسے مقامات پر تیزی سے پھیلتا ہے اور عموماً معدے کی شدید خرابی کا باعث بنتا ہے۔
