یونائیٹڈ نیشنز انٹر یونیورسٹی کمیٹی آ ف پیرس (سی آئی این یو پی)کے طلباء کے ایک وفد نے پیرس میں پاکستان کے سفارتخانے کا دورہ کیا اور پاکستان کی سفیر ممتاز زہرا بلوچ کے ساتھ ملاقات کی۔بدھ کو سفارتخانے سے جاری بیان کے مطابق اس انتہائی اہم نشست کے دوران طلباء کو کثیر الجہتی سفارت کاری میں پاکستان کے کردار پر تفصیلی بریفنگ دی گئی، جس میں خاص طور پر پیرس میں قائم بین الاقوامی تنظیموں کے ساتھ پاکستان کے اشتراکِ عمل پر توجہ مرکوز کی گئی۔ اس پریزنٹیشن کے بعد سوال و جواب کا ایک معلوماتی سیشن بھی منعقد ہوا۔
پیرس میں پاکستان کی سفیر ممتاز زہرا بلوچ نے کثیرالجہتی نظام، بین الاقوامی قوانین اور تنازعات کے پرامن حل کے لیے پاکستان کے پختہ عزم کا اعادہ کیا۔ انہوں نے طلباء کو بین الاقوامی اداروں کے منشور کو آگے بڑھانے اور ترقی پذیر ممالک کی ترجیحات کی وکالت کرنے میں پاکستان کے مثبت اور تعمیری کردار کے بارے میں بھی آگاہ کیا۔ واضح رہے کہ سی آئی این یو پی، پیرس میں قائم طلباء کی ایک تنظیم ہے جو اقوامِ متحدہ کے کام اور کثیر جہتی سفارت کاری کے حوالے سے شعور اور دلچسپی کو فروغ دیتی ہے۔
