فرانس کے شمالی علاقے مازنگارب(Mazingarbe) میں ایک افسوسناک ٹرین حادثہ پیش آیا، جہاں ڈنکرک سے پیرس جانے والی تیز رفتار ٹی جی وی (TGV) ٹرین ایک بھاری مال بردار ٹرک سے ٹکرا گئی، جس کے نتیجے میں ٹرین کا ڈرائیور موقع پر جاں بحق جبکہ متعدد افراد زخمی ہوگئے۔
حادثہ مقامی وقت کے مطابق صبح تقریباً 7 بجے ایک لیول کراسنگ پر پیش آیا، جہاں ٹرین تقریباً 240 سے زائد مسافروں کو لے کر جا رہی تھی۔ تصادم اس قدر شدید تھا کہ ٹرین کے اگلے حصے کو شدید نقصان پہنچا اور کئی ڈبے متاثر ہوئے۔
ابتدائی اطلاعات کے مطابق حادثے میں کم از کم ایک شخص جاں بحق جبکہ 13 سے زائد افراد زخمی ہوئے، جن میں سے بعض کی حالت تشویشناک بتائی جا رہی ہے۔ زخمیوں کو فوری طور پر قریبی اسپتالوں میں منتقل کر دیا گیا ہے۔
فرانسیسی حکام کے مطابق ٹرین ایک بھاری ٹرک کے ٹریلر سے ٹکرائی جو ریلوے کراسنگ پر موجود تھا۔ حادثے کے بعد امدادی ٹیمیں فوری طور پر موقع پر پہنچ گئیں اور مسافروں کو محفوظ مقامات پر منتقل کیا گیا۔
حادثے کے باعث علاقے میں ریلوے ٹریفک معطل کر دی گئی جبکہ متاثرہ روٹس پر بجلی کی فراہمی بھی عارضی طور پر بند کر دی گئی۔ مسافروں کی سہولت کے لیے متبادل بس سروس کا انتظام کیا گیا۔
فرانس کے وزیر ٹرانسپورٹ نے واقعے پر گہرے دکھ اور افسوس کا اظہار کرتے ہوئے کہا ہے کہ حادثے کی مکمل تحقیقات کی جائیں گی، جبکہ ریلوے حکام اور امدادی ادارے صورت حال پر قابو پانے کے لیے سرگرم ہیں۔
حکام نے خدشہ ظاہر کیا ہے کہ زخمیوں کی حالت کے پیش نظر ہلاکتوں میں اضافہ بھی ہو سکتا ہے، جبکہ حادثے کی وجوہات جاننے کے لیے تحقیقات جاری ہیں۔
