اٹلی کے شہر میلان میں ایک پاکستانی ڈلیوری رائیڈر کو جمعہ کی رات تقریباً 10 بجے چاقو مار کر زخمی کر دیا گیا، جبکہ پولیس واقعے میں ملوث تین نوجوانوں کی تلاش کر رہی ہے۔
اطالوی میڈیا کے مطابق یہ واقعہ Brenta کے علاقے میں ایک فاسٹ فوڈ ریسٹورنٹ کے باہر پیش آیا، جہاں 30 سالہ رضوان اپنے آرڈر کا انتظار کر رہا تھا۔ عینی شاہدین کے مطابق تین نوجوان اچانک وہاں پہنچے اور جھگڑا شروع ہو گیا۔ رضوان نے اپنے ایک دوست کو ان کی بدتمیزی سے بچانے کی کوشش کی، جس پر حملہ آوروں نے اسے چاقو مار دیا۔
حملے کے نتیجے میں رضوان کے کندھے پر زخم آیا۔ زخمی رائیڈر کو فوری طور پر اسپتال منتقل کیا گیا، جہاں طبی امداد کے بعد اس کی حالت خطرے سے باہر بتائی جا رہی ہے۔
پولیس کے مطابق حملہ آور ہڈ پہنے ہوئے تھے اور واقعے کے فوراً بعد فرار ہو گئے۔ قانون نافذ کرنے والے ادارے علاقے کے سی سی ٹی وی کیمروں سے ملزمان کی شناخت کی کوشش کر رہے ہیں۔ ابتدائی تحقیقات کے مطابق یہ واقعہ ڈکیتی نہیں بلکہ بلا وجہ تشدد کا شاخسانہ معلوم ہوتا ہے۔
پولیس نے شہریوں سے اپیل کی ہے کہ اگر کسی کے پاس واقعے سے متعلق معلومات ہوں تو وہ حکام سے رابطہ کریں تاکہ ملزمان کو جلد گرفتار کیا جاسکے ۔
