سوشل میڈیا پر وزیراعلیٰ خیبر پختونخوا علی امین گنڈاپور کو ہٹانے کی افواہیں گمراہ کن ہیں،سہیل آفریدی
سہیل آفریدی کا کہنا ہے کہ سوشل میڈیا پر وزیراعلیٰ خیبر پختونخوا علی امین گنڈاپور(Ali Ameen Gandapur) کو ہٹانے کی افواہیں گمراہ کن ہیں ، سوشل میڈیا پر علی امین گنڈاپور کی جگہ مجھے وزیراعلیٰ نامزد کرنے کی خبر جھوٹی ہے۔
اپنے ایک بیان میں انہوں نے کہا کہ مجھ سے منسوب تمام خبریں جھوٹ، بے بنیاد اور حقائق کے منافی ہیں،وزیراعلیٰ خیبر پختونخوا کی تبدیلی سے متعلق تمام دعوے جھوٹے اور گمراہ کن ہیں۔
صوبائی حکومت کی سطح پر وزیراعلیٰ کی تبدیلی کا کوئی فیصلہ نہیں ہوا،علی امین گنڈاپور بانی پی ٹی آئی کے اعتماد یافتہ اور وفادار ساتھی ہیں وہی وزیراعلیٰ رہیں گے۔
دوسری جانب چیئرمین پی ٹی آئی بیرسٹر گوہر نے بھی کہا ہے کہ علی امین گنڈاپور سے متعلق کوئی فیصلہ نہیں ہوا، تمام افواہیں پارٹی کو تقسیم کرنے کی سازش ہیں۔
میڈیا سے گفتگو کرتے ہوئے انہوں نے کہا کہ جھوٹی اور من گھڑت خبریں پھیلا کر پارٹی کو کمزور کرنے کی کوشش کی جا رہی ہے، جھوٹی اور من گھڑت خبروں کی سختی سے مخالفت کرتے ہیں۔
ایسی سازشوں کا مقصد داخلی انتشار پیدا کرنا ہے، ہم ہر حالات میں متحد رہیں گے،علی امین گنڈاپور ہی ہمارے وزیراعلیٰ ہیں، ان کیخلاف پھیلائی جانے والی افواہیں بے بنیاد ہیں۔
پارٹی کو تقسیم کرنے والی ہر کوشش کا مؤثر جواب دیا جائے گا، ہر سازش کو ناکام بنائیں گے،سچائی اور تنظیمی یکجہتی کے دفاع کیلئے ہم ہر فورم پر اپنا مؤقف واضح کریں گے،انتشار پھیلانے والوں کو کامیاب نہیں ہونے دیا جائے گا۔
