پیرس کے نواحی شہر لاکورنیو میں پاکستانی کاروباری شخصیات چوہدری فرخ گوندل، عامر گوندل اور آصف گوندل کے نئے کنسٹرکشن میٹریل اسٹور ’’باتی ماتو‘‘ کا افتتاح کر دیا گیا۔ تقریب کے مہمانِ خصوصی پاکستان بزنس فورم یورپ کے چیئرمین سردار ظہور اقبال تھے، جنہوں نے فیتہ کاٹ کر کاروبار کا باقاعدہ افتتاح کیا۔
تقریب میں پاکستانی کمیونٹی کی نمائندہ شخصیات، کاروباری افراد اور کنسٹرکشن کے شعبے سے وابستہ افراد نے بڑی تعداد میں شرکت کی۔ سردار ظہور اقبال نے پاکستانی نوجوانوں کے کاروباری جذبے کو سراہتے ہوئے ’’باتی ماتو‘‘ کے قیام کو کمیونٹی کے لیے مثبت پیش رفت قرار دیا اور مالکان کے لیے نیک خواہشات کا اظہار کیا۔
ڈائریکٹر فرخ گوندل نے تمام مہمانوں کا شکریہ ادا کرتے ہوئے کہا کہ ’’باتی ماتو‘‘ میں صارفین کو معیاری کنسٹرکشن مصنوعات فراہم کرنے اور کاروباری سرگرمیوں کو مزید وسعت دینے پر توجہ دی جائے گی۔
تقریب میں سرپرست پاکستان پریس کلب پیرس (رجسٹرڈ) فرانس ، کوآرڈنیٹر پاکستان بزنس فورم فرانس صاحبزادہ عتیق الرحمن ، پاکستان بزنس فورم یورپ کے سینئر نائب صدر ڈاکٹر حمزہ تاج، جنرل سیکریٹری یاسر خان، لیگل ایڈوائزر چوہدری سلمان اسلم، میڈیا کوآرڈینیٹر خرم شہزاد وزیرآبادی سمیت متعدد سماجی و کاروباری شخصیات نے شرکت کی۔
فرانس میں پاکستانی کمیونٹی کی نئی نسل کا مختلف شعبوں میں کاروباری سفر اس بات کا مظہر ہے کہ وہ معاشی خودمختاری کے ساتھ مقامی معیشت، روزگار اور کاروباری سرگرمیوں کے فروغ میں بھی مؤثر کردار ادا کر رہی ہے۔
