یورپ میں پنجاب کے روایتی کھیل نیزہ بازی کی دھوم
پنجاب کا روایتی اور قدیم کھیل نیزہ بازی اب یورپ کے میدانوں میں بھی اپنی دھاک بٹھا رہا ہے۔
برطانیہ میں ہونے والے انٹرنیشنل نیزہ بازی ( ٹینٹ پیکنگ ) ٹورنامنٹ میں فرانس کے پاک گجر سٹار کلب نے شاندار کارکردگی کا مظاہرہ کرتے ہوئے کامیابی حاصل کی، جس کی خوشی میں پیرس میں ایک پروقار عشائیے کا اہتمام کیا گیا۔
تقریب کے میزبان، فرانس کی معروف کاروباری شخصیت اور صفِ اول کے گھڑ سوار، چوہدری سجاد نمبردار تھے۔ عشائیے میں فرانس بھر سے نیزہ بازی اور گھڑ سواری کا شوق رکھنے والے افراد نے شرکت کی اور فاتح کھلاڑیوں کو مبارکباد اور بھرپور خراجِ تحسین پیش کیا۔
اس موقع پر بانی پاک گجر سٹار کلب فرانس انٹرنیشنل، چوہدری سجاد نمبردار نے کہا کہ نیزہ بازی پنجاب کی شناخت، بہادری اور ثقافت کی علامت ہے، اور یہ ان کے لیے باعثِ فخر ہے کہ ان کا کلب پاکستان سے لے کر یورپ تک اس روایتی کھیل کو زندہ رکھنے اور فروغ دینے میں اپنا کردار ادا کر رہا ہے۔
مہمانوں نے برطانیہ کے ٹورنامنٹ میں کامیابیاں سمیٹ کر واپس آنے والے نوجوانوں اور چوہدری سجاد نمبردار کو مبارکباد دی اور ان کے ساتھ تصاویر بھی بنوائیں۔
تقریب میں شرکاء کی پرتکلف کھانوں سے تواضع کی گئی، جبکہ مہمانوں نے پاکستانی ثقافت کے اس خوبصورت رنگ کو یورپ میں اجاگر کرنے پر خوشی کا اظہار کیا۔
