سینیٹر فیصل واوڈا کا کہنا ہے کہ رضا ڈار پر شرمناک الزام کے بعد اسحاق ڈار استعفیٰ دیں،ان الزامات بعد اسحاق ڈار کے ساتھ کون پاکستان کے جھنڈے تلے کھڑا ہوسکتا ہے۔ ایکس پر اپنے بیان میں سینیٹر فیصل واوڈا کا کہنا تھا کہ اسحاق ڈار نائب وزیراعظم اور ماشا اللہ وزیر خارجہ بھی ہیں، پاکستان کو فیملی کارپوریشن کی طرح چلایا جارہا ہے، اسحاق ڈار کے مبینہ قریبی رشتے دار پر غیرملکی خواتین کے ریپ اور تشدد کے الزامات ہیں، ملزم پر غیرملکی خواتین کو بلا کر ریپ، تشدد اور بھتہ خوری کے الزامات سامنے آئے ہیں۔
انہوں نے کہا کہ غیرملکی سفارتخانے کی مداخلت پر ملزم کی گرفتاری عمل میں لائی گئی،
سینیٹر نے کہا کہ کیس کو ریپ کے بجائے محض بھتہ خوری تک محدود کرنے کی کوششیں جاری ہیں، مظلوم غیر ملکی خواتین کو جلد ملک سے واپس بھیجنے کی تیاریاں کی جارہی ہیں، کیس میں دفعہ 164کا بیان اب تک سامنے نہیں لایا گیا ہے۔
فیصل واوڈا نے کہا کہ ماضی کے ریکارڈ کو مدنظر رکھتے ہوئے کیس میں من پسند میڈیکل رپورٹس لی جاتی ہیں، جمہوریت کے نام پر 500 افراد کی ایلیٹ کلاس نے پورے ملک پر قبضہ کیا ہوا ہے، جمہوری جماعتوں اور جمہوری جنازوں کو بے نقاب کرتا آرہا ہوں۔ انہوں نے کہا کہ قوم دیکھے کسی پارٹی یا اس کے لیڈر اپوزیشن ہو یا حکومت کسی کا بھی مذمتی بیان نہیں آیا، میں نے پہلے ہی کہا تھا کچھ پاکستانیوں کے انٹرنیشنل اسکینڈلز اور ویڈیوز منظرعام پر آئیں گی.
