رپورٹ: واجد قریشیؔ (ڈنمارک)
کوپن ہیگن(ڈنمارک): ڈنمارک کے دارالحکومت کوپن ہیگن میں منہاج ویلفیئر فاؤنڈیشن کے زیرِ اہتمام پاکستان میں یتیم بچوں کی کفالت کے لیے ایک عظیم الشان روحانی قوالی نائٹ کا انعقاد کیا گیا، جس نے نہ صرف کمیونٹی کو ایک پلیٹ فارم پر جمع کیا بلکہ ایثار، محبت اور خدمتِ خلق کا عملی مظاہرہ بھی پیش کیا۔ بلوم میریج ہال ویلبی میں منعقدہ اس پروقار تقریب میں چار سو سے زائد افراد نے اپنے اہلِ خانہ کے ہمراہ شرکت کی اور روحانیت سے لبریز اس محفل کو یادگار بنا دیا۔
محفل کی خاص بات معروف قوال قیصر محمود قوال کی شرکت تھی، جو اپنے ہمنوا ساتھیوں کے ہمراہ خصوصی طور پر انگلینڈ سے تشریف لائے۔ ان کے سحر انگیز صوفیانہ کلام نے حاضرین کے دلوں کو گرما دیا اور ایک ایسا روحانی ماحول پیدا کیا جس میں عقیدت، محبت اور وجد کی کیفیت نمایاں تھی۔ حاضرین نے نہ صرف بھرپور داد دی بلکہ یتیم بچوں کی کفالت کے لیے دل کھول کر عطیات بھی پیش کیے، جس سے اس تقریب کا فلاحی پہلو مزید نمایاں ہو گیا۔
تقریب میں پاکستان کے سفیر جناب شعیب سرور نے اپنی اہلیہ کے ہمراہ شرکت کی اور منتظمین کو اس شاندار اور کامیاب انعقاد پر مبارکباد پیش کی۔ اپنے خطاب میں انہوں نے کہا کہ ایسے فلاحی اقدامات نہ صرف مستحق افراد کی مدد کا ذریعہ بنتے ہیں بلکہ کمیونٹی کے اتحاد، باہمی محبت اور مثبت سماجی تبدیلی کے فروغ میں بھی اہم کردار ادا کرتے ہیں۔ انہوں نے مزید کہا کہ وہ منہاج القرآن کی سرگرمیوں اور فلاحی و دینی پروگرامز میں شرکت کو ترجیح دیتے ہیں، کیونکہ یہ اقدامات معاشرے میں خیر، خدمت اور یکجہتی کے جذبے کو مضبوط کرتے ہیں۔
فرانس سے نامور اسلامی اسکالر علامہ حسن میر قادری خصوصی طور پر اس روحانی و فلاحی تقریب میں شرکت کے لیے تشریف لائے۔ اس موقع پر انہوں نے قرآن و حدیث کی روشنی میں یتیموں کی کفالت اور ضرورت مندوں کی مدد کی اہمیت پر تفصیلی گفتگو کی۔ انہوں نے کہا کہ اسلام میں یتیم کی کفالت کو نہایت بلند مقام حاصل ہے اور یہ عمل نہ صرف دنیاوی کامیابی بلکہ اخروی نجات کا ذریعہ بھی ہے۔ انہوں نے شرکاء کو اس کارِ خیر میں بڑھ چڑھ کر حصہ لینے کی ترغیب دیتے ہوئے کہا کہ معاشرے کی حقیقی بہتری اسی وقت ممکن ہے جب ہم کمزور طبقات کا سہارا بنیں اور خدمتِ انسانیت کو اپنی زندگی کا مقصد بنائیں۔
صدر منہاج ویلفیئر ڈنمارک صبغت ریاض نے اپنی پُراثر گفتگو میں تمام شرکاء کا تہہ دل سے شکریہ ادا کرتے ہوئے کہا کہ آج کی یہ محفل اس بات کا ثبوت ہے کہ ہماری کمیونٹی نہ صرف اپنی روایات سے جڑی ہوئی ہے بلکہ خدمتِ انسانیت کے جذبے سے بھی سرشار ہے۔ آپ سب کی شرکت اور تعاون ہمارے لیے باعثِ حوصلہ ہے اور انہی کوششوں کے ذریعے ہم پاکستان میں یتیم بچوں کے بہتر مستقبل کی ضمانت بن سکتے ہیں۔
صدر منہاج القرآن ڈنمارک قیصر نجیب نے اپنے پیغام میں کہا کہ برصغیر میں اولیاء اللہ نے محبت، رواداری اور اعلیٰ اخلاق کے ذریعے دلوں کو مسخر کیا۔ حضرت نظام الدین اولیاء کی خانقاہ سے انسانیت اور روحانیت کا پیغام عام ہوا، جبکہ ان کے مرید امیر خسرو نے قوالی کو ایک مؤثر روحانی ذریعہ بنا کر اس پیغام کو مزید وسعت دی۔ یہی صوفیانہ روایت آج بھی ہمیں محبت، بھائی چارے اور خدمتِ انسانیت کی طرف رہنمائی دیتی ہے، اور ایسی محافل اسی پیغام کی تجدید ہیں۔
اس روحانی محفل کی نظامت ڈاکٹر عرفان ظہور احمد نے نہایت شاندار اور احسن انداز میں انجام دی۔ ان کی پُراثر اور باوقار اسٹیج سیکرٹری نے پروگرام کو ایک خوبصورت تسلسل فراہم کیا اور ہر لمحہ حاضرین کو محفل سے جوڑے رکھا۔ پروگرام کے اختتام پر خصوصی دعا سید اعجاز شاہ بخاری نے کرائی، جس میں امتِ مسلمہ کی بھلائی، یتیم بچوں کے روشن مستقبل اور دنیا میں امن و سلامتی کے لیے دعا کی گئی۔
اس موقع پر منہاج ویلفیئر فاؤنڈیشن یورپ کی جانب سے منہاج ویلفیئر ڈنمارک کو ان کی شاندار کارکردگی اور فلاحی خدمات کے اعتراف میں اعزازی شیلڈ سے بھی نوازا گیا۔ یہ اعزاز پاکستان کے سفیر جناب شعیب سرور نے اپنے دستِ مبارک سے پیش کیا۔ اس موقع پر شرکاء نے منہاج ویلفیئر ڈنمارک کی سماجی و فلاحی خدمات کو زبردست خراجِ تحسین پیش کیا اور اس اعزاز کو ٹیم کی مسلسل محنت اور خدمتِ انسانیت کا اعتراف قرار دیا۔
یہ قوالی نائٹ نہ صرف ایک روحانی و ثقافتی محفل ثابت ہوئی بلکہ فلاحی کاموں کے لیے بھرپور تعاون حاصل کرنے کا ایک مؤثر ذریعہ بھی بنی۔ اس تقریب نے یہ واضح کر دیا کہ جب کمیونٹی ایک نیک مقصد کے لیے متحد ہو جائے تو وہ نہ صرف دلوں کو جوڑ سکتی ہے بلکہ معاشرے میں حقیقی مثبت تبدیلی بھی لا سکتی ہے۔
