اٹلی نے ایران کے خلاف جنگ سے منسلک امریکی طیاروں کو بحیرہ روم کے اطالوی جزیرے سسلی میں واقع ایک فوجی اڈے پر لینڈنگ کی اجازت دینے سے انکار کر دیا ہے۔ اطالوی وزیر دفاع گیڈو کروسیٹو نے امریکی فوج کو سیگونیلا ایئر بیس کو مشرق وسطیٰ کے لیے پروازوں کے عبوری مرکز کے طور پر استعمال کرنے کی اجازت دینے سے انکار کر دیا ہے۔ یہ رپورٹ اطالوی اخبار کوریئرے دے لا سیرا نے شائع کی۔
روم میں اطالوی وزارت دفاع کے قریبی ذرائع نے بھی اس خبر کی تصدیق کر دی ہے۔ رپورٹ کے مطابق اٹلی کو امریکی منصوبے سے اس وقت آگاہ کیا گیا، جب امریکی طیارے پہلے ہی راستے میں تھے، جبکہ نہ تو پیشگی اجازت طلب کی گئی تھی اور نہ ہی نیٹو اتحادی ہونے کے باوجود اٹلی کو اس بارے میں قبل از وقت مطلع کیا گیا تھا۔
پروازوں کی نوعیت سے متعلق تفصیلات واضح نہیں ہو سکیں۔ مشرقی سسلی کے شہر کاتانیا کے قریب واقع سیگونیلا ایئر بیس اطالوی فضائیہ اور امریکی بحریہ دونوں کے زیر استعمال ہے جبکہ یہ مقام مغربی دفاعی اتحاد نیٹو کی سرگرمیوں کے لیے بھی استعمال ہوتا ہے۔
