یومِ پاکستان کے موقع پر فرانس کے دارالحکومت پیرس میں واقع پاکستانی سفارتخانے میں پرچم کشائی کی ایک سادہ مگر باوقار تقریب منعقد ہوئی۔ تقریب میں پاکستانی کمیونٹی کی بڑی تعداد اور سفارتخانے کے حکام نے شرکت کی۔ موجودہ علاقائی صورتحال اور حکومتی ہدایات کے پیش نظر تقریب کو سادگی اور وقار کے ساتھ منعقد کیا گیا۔
اس موقع پر صدرِ پاکستان، وزیرِ اعظم اور وزیرِ خارجہ کے خصوصی پیغامات پڑھ کر سنائے گئے۔
تقریب سے خطاب کرتے ہوئے فرانس میں پاکستان کی سفیر محترمہ ممتاز زہرہ بلوچ نے بانیٔ پاکستان قائداعظم محمد علی جناح کی بصیرت افروز قیادت کو خراجِ عقیدت پیش کیا۔ انہوں نے کہا کہ علامہ ڈاکٹر محمد اقبال کے خواب کو حقیقت بنانے کے لیے بے شمار قربانیاں دی گئیں اور متعدد مشکلات کا سامنا کرنا پڑا۔
سفیر پاکستان نے پاکستانی قوم کی ثابت قدمی اور مضبوط عزم کو سراہتے ہوئے کہا کہ قوم نے اپنی تاریخ میں ہر مشکل کا ڈٹ کر مقابلہ کیا اور ہمیشہ اتحاد و یگانگت کا مظاہرہ کیا۔ انہوں نے گزشتہ سال مئی میں “معرکۂ حق” کے دوران پاکستان کے عزم و حوصلے اور آپریشن بنیان المرصوص اور غضب للحق کے ذریعے قومی خودمختاری اور علاقائی سالمیت کے تحفظ کو بھی یاد کیا۔
محترمہ ممتاز زہرہ بلوچ نے کہا کہ یومِ پاکستان مناتے ہوئے ہمیں ان اقوام کو نہیں بھولنا چاہیے جو آج بھی جبر اور غیر ملکی تسلط کا شکار ہیں۔ انہوں نے فلسطین اور بھارت کے زیرِ تسلط جموں و کشمیر کے عوام کے ساتھ پاکستان کی مستقل سفارتی اور سیاسی حمایت کا اعادہ کیا، جو بدترین مظالم اور استعماری جبر کا سامنا کر رہے ہیں۔
انہوں نے پاکستان اور فرانس کے درمیان تعلقات کی اہمیت پر بھی روشنی ڈالتے ہوئے کہا کہ دونوں ممالک دوطرفہ روابط، مکالمے، تجارت اور سرمایہ کاری کے فروغ کے لیے پرعزم ہیں۔ انہوں نے فرانس میں مقیم پاکستانی کمیونٹی کی خدمات کو سراہا اور کہا کہ وہ دونوں ممالک کے درمیان عوامی روابط کو مضبوط بنانے میں اہم کردار ادا کہی ہے۔
