یورپی ملک مالٹا کی حکومت نے ٹریفک کے بڑھتے ہوئے دباؤ اور ماحولیاتی مسائل سے نمٹنے کے لیے ایک منفرد اسکیم متعارف کرائی ہے، جس کے تحت شہریوں کو ڈرائیونگ لائسنس عارضی طور پر ترک کرنے کے بدلے خطیر رقم دی جائے گی۔
اس منصوبے کو “ڈرائیونگ لائسنس سرینڈر اسکیم” کا نام دیا گیا ہے، جس کے تحت اہل افراد اپنے ڈرائیونگ لائسنس کو پانچ سال کے لیے رضاکارانہ طور پر جمع کروائیں گے۔ اس کے بدلے حکومت کی جانب سے انہیں مجموعی طور پر €25,000 (تقریباً 27 سے 30 ہزار امریکی ڈالر) فراہم کیے جائیں گے۔
حکومتی پالیسی کے مطابق یہ رقم ایک ساتھ ادا نہیں کی جائے گی بلکہ پانچ سال کے عرصے میں سالانہ €5,000 کی قسطوں میں دی جائے گی۔ حکام کا کہنا ہے کہ اس اقدام کا مقصد سڑکوں پر گاڑیوں کی تعداد کم کرنا، ٹریفک کے مسائل کو حل کرنا اور ماحول دوست سفری ذرائع کو فروغ دینا ہے۔
یہ اسکیم خاص طور پر نوجوان افراد کے لیے متعارف کرائی گئی ہے، جن کی عمر 30 سال سے کم ہو اور وہ کم از کم سات سال سے ملک میں مقیم ہوں۔ مزید برآں، اسکیم میں شامل ہونے والے افراد پانچ سال کے دوران کسی بھی ملک میں گاڑی چلانے کے مجاز نہیں ہوں گے، بصورت دیگر انہیں جرمانہ ادا کرنا پڑے گا اور حاصل کی گئی رقم واپس کرنا ہوگی۔
ماہرین کے مطابق یہ اقدام شہریوں کو پبلک ٹرانسپورٹ اور متبادل سفری ذرائع اپنانے کی ترغیب دینے کی ایک کوشش ہے، تاہم اس کے طویل مدتی اثرات کا جائزہ وقت کے ساتھ ہی لیا جا سکے گا۔
