اربیل/بغداد (بین الاقوامی خبر ایجنسیاں)
عراق کے شمالی علاقے مخمور میں قائم مشترکہ فوجی اڈے پر ڈرون حملے کے نتیجے میں کم از کم 6 فرانسیسی فوجی زخمی ہوگئے۔
عراقی کردستان کے دارالحکومت اربیل کے گورنر اومید خوشناو کے مطابق حملہ مخمور کے علاقے ملا قارا میں واقع پیشمرگہ بیس کو نشانہ بنا کر کیا گیا جہاں فرانسیسی فوجی اہلکار بھی تعینات ہیں۔ حملے کے بعد زخمی اہلکاروں کو فوری طور پر قریبی ہسپتال منتقل کر دیا گیا۔
فرانسیسی فوج نے بھی واقعے کی تصدیق کرتے ہوئے کہا ہے کہ زخمی اہلکار عراق میں اتحادی افواج کے ساتھ مل کر دہشت گردی کے خلاف تربیتی مشن میں شریک تھے۔
مقامی حکام کے مطابق حملے میں پیشمرگہ فورس کے کسی اہلکار کے زخمی ہونے کی اطلاع نہیں ملی، تاہم عراقی حکومت اور سکیورٹی اداروں نے واقعے کی تحقیقات شروع کر دی ہیں۔
عراق میں گزشتہ کچھ عرصے کے دوران غیر ملکی افواج کے اڈوں پر ڈرون اور راکٹ حملوں میں اضافہ دیکھا جا رہا ہے، جس کے باعث خطے میں سکیورٹی خدشات بڑھ گئے ہیں۔
