ضلع گجرات بھر میں منشیات فروشوں کے خلاف جاری سخت کارروائیوں کے سلسلے میں تھانہ صدر سرائے عالمگیر نے ایک بڑی کامیابی حاصل کی ہے۔
ڈی پی او گجرات رانا عمرفاروق کے احکامات اور سرائے عالمگیر سرکل میں ڈی ایس پی ڈاکٹر ممتاز احمد میکن کی نگرانی میں ایس ایچ او تھانہ صدر آفتاب رسول چوہان کی قیادت میں پولیس ٹیم نے محنت، جانفشانی اور بہترین حکمت عملی کے ساتھ دو منشیات فروشوں کو گرفتار کر لیا۔
گرفتار ملزمان میں محمد ابوبکر ولد ریاض، سکنہ شادمان گجرات، کے قبضہ سے کروڑوں روپے مالیت کی 11 کلو چرس برآمد ہوئی، جبکہ دوسری کارروائی میں نبیل ولد قیصر محمود، سکنہ کوٹیاں، کے قبضہ سے ایک کلو چرس برآمد کی گئی۔ پولیس نے دونوں ملزمان کے خلاف الگ الگ مقدمات درج کر کے تفتیش شروع کر دی ہے۔
ڈی پی او گجرات رانا عمرفاروق کا کہنا ہے کہ منشیات فروش معاشرے کا ناسور ہیں اور نوجوان نسل کی تباہی کا سبب بن رہے ہیں، جن کے خلاف بلا تفریق کارروائیاں جاری رہیں گی۔
یہ کارروائی ضلع میں منشیات کے خلاف جاری مؤثر پولیس مہم کا حصہ ہے اور مقامی عوام میں پولیس کی کارکردگی کے تاثر کو مزیدمستحکم کرتی ہے۔
