پاکستان کی فرانس میں سفیر ممتاز زہرا بلوچ نے کہا ہے کہ پاکستان کا دشمن افغانستان کے عوام نہیں بلکہ وہ دہشت گرد گروہ ہیں جن کے بارے میں اسلام آباد کا مؤقف ہے کہ انہیں افغان حکومت کی سرپرستی حاصل ہے۔
فرانسیسی نشریاتی ادارے فرانس 24 کو دیے گئے انٹرویو میں ممتاز زہرا بلوچ نے واضح کیا کہ پاکستان خطے میں امن اور استحکام کا خواہاں ہے، تاہم دہشت گردی کے خطرات سے نمٹنے کے لیے ضروری اقدامات کرنا اس کی ذمہ داری ہے۔
یہ بیان ایک روز بعد سامنے آیا جب اسلام آباد نے کابل اور افغانستان کے دیگر شہروں میں فضائی کارروائیاں کیں۔ پاکستانی حکومت کا کہنا ہے کہ یہ کارروائیاں ان دہشت گرد عناصر کے خلاف کی گئیں جو پاکستان میں حملوں میں ملوث رہے ہیں۔
سفیر ممتاز زہرا بلوچ نے اپنے انٹرویو میں کہا کہ پاکستان افغانستان کے عوام کے ساتھ برادرانہ تعلقات کا خواہاں ہے اور دونوں ممالک کے درمیان پائیدار امن کے لیے تعاون ناگزیر ہے۔ انہوں نے اس بات پر زور دیا کہ دہشت گردی کے خلاف مشترکہ حکمت عملی اپنانا وقت کی اہم ضرورت ہے۔
پاکستانی سفیر کے مطابق خطے میں امن کے قیام کے لیے ضروری ہے کہ دہشت گرد تنظیموں کے خلاف مؤثر کارروائی کی جائے تاکہ دونوں ممالک کے عوام محفوظ اور پرامن ماحول میں زندگی گزار سکیں۔
