اٹلی کے شہر سالیرنو میں قتل کے شبہے میں گرفتار پاکستانی نژاد شہری نذیم وقاص کو مقامی عدالت نے رہا کرنے کا حکم دے دیا ہے۔ اطالوی میڈیا رپورٹس کے مطابق عدالت نے ابتدائی سماعت کے بعد ملزم کی احتیاطی حراست ختم کرتے ہوئے اسے رہا کرنے کی منظوری دی۔
زرائع کے مطابق نذیم وقاص کو جنوری 2026 میں اٹلی کے علاقے بیرونِسی سے گرفتار کیا گیا تھا،ان کی گرفتاری ایک بین الاقوامی وارنٹ کی بنیاد پر عمل میں آئی، جس میں انہیں پاکستان میں مبینہ دوہرے قتل کے مقدمے میں مطلوب قرار دیا گیا تھا۔
رپورٹس کے مطابق ملزم پر اٹلی میں بعض امیگریشن اور ویزا سے متعلق بے ضابطگیوں کے الزامات بھی زیرِ تفتیش تھے تاہم حالیہ عدالتی فیصلے میں مقامی عدالت نے احتیاطی حراست کو برقرار رکھنے کی ضرورت نہ ہونے پر انہیں رہا کرنے کا حکم جاری کیا۔
واضح رہے کہ دستیاب عدالتی معلومات کے مطابق یہ فیصلہ صرف اٹلی میں جاری قانونی کارروائی اور حراست سے متعلق ہے، عدالت کی جانب سے پاکستان کو باقاعدہ حوالگی (استرداد) کے بارے میں کوئی حتمی فیصلہ سامنے نہیں آیا، استرداد کا معاملہ اطالوی قانون اور دونوں ممالک کے درمیان موجود قانونی معاہدوں کے تحت علیحدہ عدالتی و انتظامی عمل سے مشروط ہوتا ہے۔
ذرائع کے مطابق رہائی کے بعد نذیم وقاص اپنے اہلِ خانہ کے ساتھ مقیم ہیں، جبکہ قانونی کارروائی سے متعلق مزید پیش رفت کا انتظار کیا جا رہا ہے،حکام کی جانب سے اس بارے میں مزید تفصیلات جاری نہیں کی گئیں۔
