اسلام آباد، 27 فروری : وفاقی وزیر اطلاعات و نشریات عطا اللہ تارڑ نے جمعرات کو کہا ہے کہ افغان طالبان حکومت نے زمینی سطح پر شرمناک شکست کے بعد اپنی سبکی چھپانے کے لیے پروپیگنڈا اور جھوٹ کا سہارا لیا ہے۔
اپنے بیان میں انہوں نے کہا کہ افغان طالبان حکومت بھارتی سوشل میڈیا اکاؤنٹس کے ساتھ مل کر ایسا بے بنیاد پروپیگنڈا کر رہی ہے جس کا حقائق سے کوئی تعلق نہیں۔ انہوں نے واضح کیا کہ انہیں اس قسم کی افواہیں پھیلانے کی اجازت نہیں دی جائے گی، کیونکہ یہ محض خواہش پر مبنی باتیں ہیں اور ان کا مقصد اپنی خفت مٹانا ہے۔
وفاقی وزیر نے افغان طالبان کی ’’بلااشتعال کارروائی‘‘ کو سنگین غلط اندازہ قرار دیتے ہوئے کہا کہ سیکیورٹی فورسز نے مؤثر جواب دیتے ہوئے دشمن کو کاری ضرب لگائی۔ انہوں نے کہا کہ پاک افغان سرحد پر کسی بھی بلااشتعال اقدام کا بھرپور اور مؤثر جواب دیا جاتا رہے گا۔
عطا اللہ تارڑ نے بتایا کہ مصدقہ اطلاعات کے مطابق پاکستان کی مسلح افواج کی مؤثر جوابی کارروائی میں 36 افغان اہلکار ہلاک ہوئے، جبکہ مادرِ وطن کا دفاع کرتے ہوئے پاک فوج کے دو جوان شہید اور تین زخمی ہوئے۔
انہوں نے کہا کہ پاکستان نے حال ہی میں فتنہ الخوارج کے خلاف کامیاب آپریشن کیا، جو خطے میں بالخصوص پاکستان کے اندر معصوم شہریوں کی شہادت میں ملوث تھے۔ ان کا کہنا تھا کہ فتنہ الخوارج کے دفاع میں پاکستان کی سرحدی حدود میں افغان طالبان کی بلااشتعال فائرنگ نے ایک بار پھر پوری دنیا کے سامنے دہشت گردوں کی سرپرستی کو بے نقاب کر دیا ہے۔
وفاقی وزیر نے کہا کہ طالبان حکومت کو اشتعال انگیز اقدامات کے بجائے ماضی کی پسپائیوں سے سبق سیکھنا چاہیے۔ انہوں نے اس عزم کا اعادہ کیا کہ پاکستان اپنی علاقائی سالمیت کے تحفظ کے لیے پرعزم ہے اور ملک کو عدم استحکام سے دوچار کرنے کی کسی بھی دشمنانہ سازش کو کچلتا رہے گا۔
