اٹلی میں ایک مراکشی نژاد شخص کے قتل کے مقدمے میں عدالت نے سابق مقامی کونسلر کو 12 سال قید کی سزا سنا دی ہے،اطالوی خبر رساں اداروں کے مطابق Pavia کی عدالت نے انتہائی دائیں بازو کی جماعت Lega Nord (لیگا نورد) سے تعلق رکھنے والے سابق کونسلر Massimo Adriatici کو مجرم قرار دیا،
عدالتی فیصلے کے مطابق ملزم نے جولائی 2021 میں 39 سالہ مراکشی نژاد شہری Youns El Boussetaoui کو گولی مار کر قتل کیا تھا،واقعہ اٹلی کے شہر Voghera کے مرکزی چوک میں پیش آیا،استغاثہ کے مطابق مقتول، جو ذہنی مسائل کا شکار اور بے گھر تھا، واقعے کے روز ایک کیفے کے باہر موجود افراد سے وہاں سے جانے کا مطالبہ کر رہا تھا،عینی شاہدین نے بتایا کہ اس نوعیت کے واقعات پہلے بھی پیش آ چکے تھے اسی دوران سابق کونسلر نے فائرنگ کی جس سے یونس ال بوسیتاؤی موقع پر ہی ہلاک ہو گیا۔
عدالت نے 12 سال قید کی سزا کے ساتھ ملزم کو مقتول کے اہل خانہ کو 3 لاکھ 80 ہزار یورو ہرجانہ ادا کرنے کا بھی حکم دیا ہے،فیصلہ سناتے ہوئے عدالت نے قرار دیا کہ قانون کی نظر میں تمام شہری برابر ہیں اور کسی قسم کی درجہ بندی قابل قبول نہیں،
مقتول کے خاندان نے عدالتی فیصلے پر اطمینان کا اظہار کیا ہے۔
