اٹلی کے تاریخی شہر Siracusa میں مقیم دو پاکستانی نوجوان، جو اپنی قانونی دستاویزات کے سلسلے میں پولیس کے امیگریشن دفتر گئے ہوئے تھے، کو Talete Parking کے قریب ایک گمشدہ بٹوا ملا۔ ذاتی مالی مشکلات کے باوجود نوجوانوں نے دیانت داری کا مظاہرہ کرتے ہوئے بٹوا اپنے پاس رکھنے کے بجائے فوری طور پر پولیس حکام کے حوالے کر دیا۔
بٹوے میں شناختی کارڈز، کریڈٹ کارڈز، گاڑی کے اہم کاغذات اور 415 یورو نقد رقم موجود تھی۔ پولیس نے پیشہ ورانہ ذمہ داری کا ثبوت دیتے ہوئے بٹوے کے مالک تک فوری رسائی حاصل کی، جو شہر کے تاریخی مرکز میں مقیم ایک جرمن سیاح تھا، اور اسے سامان وصول کرنے کے لیے طلب کر لیا۔
اپنا قیمتی سامان بحفاظت واپس ملنے پر جرمن شہری نے اطالوی پولیس اور دونوں پاکستانی نوجوانوں کا تہہ دل سے شکریہ ادا کیا۔ اس نے نوجوانوں کی ایمانداری اور اعلیٰ اخلاق کو سراہتے ہوئے انہیں انعام دینے کی خواہش کا بھی اظہار کیا۔
یہ واقعہ اس امر کا واضح ثبوت ہے کہ پاکستانی قوم دنیا کے کسی بھی کونے میں ہو، اپنی دیانت، اخلاق اور انسانیت کی پہچان ضرور قائم کرتی ہے۔ مشکل حالات بھی ان کی نیک نیتی اور اعلیٰ کردار کو متزلزل نہیں کر سکتے۔
ایسی مثبت خبریں نہ صرف بیرونِ ملک مقیم پاکستانی کمیونٹی کا وقار بلند کرتی ہیں بلکہ معاشرے میں اعتماد، ہم آہنگی اور بھائی چارے کے فروغ کا سبب بھی بنتی ہیں
