فرانس کے دارالحکومت پیرس میں پاکستانی سفارتخانے کے زیر اہتمام یوم یکجہتی کشمیر کی تقریب میں فرانس میں پاکستان کی سفیر ممتاز زہرہ بلوچ ، فرانسیسی شہریوں اور پاکستانی و کشمیری تارکین وطن نے بڑی تعداد میں شرکت کی، اس موقعے پر کشمیری عوام کے ساتھ حمایت اور یکجہتی کا اعادہ کیا گیا۔تقریب میں صدرمملکت آصف علی زرداری ، وزیر اعظم محمد شہباز شریف اور نائب وزیر اعظم و وزیر خارجہ سینیٹر محمد اسحاق ڈار کے پیغامات پڑھ کر سنائے گئے ۔
اس موقع پر ایک دستاویزی فلم دکھائی گئی جس میں تنازعہ کشمیر کی ابتدا اور غیر قانونی طور پر بھارت کے زیر تسلط جموں و کشمیر میں بھارتی قابض افواج کے جاری مظالم پر روشنی ڈالی گئی۔ مقررین نے بھارتی قبضے سے آزادی کی جدوجہد میں بھارت کے غیر قانونی زیر تسلط جموں و کشمیر کے لوگوں کی مثالی بہادری اور قربانیوں کو خراج تحسین پیش کیا۔
مقررین نے 5 اگست 2019 کے بھارت کے یکطرفہ اور غیر قانونی اقدامات کو کشمیریوں کے ناقابل تنسیخ حق خودارادیت پر ایک اور حملہ قرار دیا۔ انہوں نے اس بات پر روشنی ڈالی کہ بھارت کے غیر قانونی زیر تسلط جموں و کشمیردنیا کا سب سے زیادہ عسکری علاقہ ہے جہاں کے مکین خوف اور دہشت کے ماحول میں رہ زندگیاں گزارنے پر مجبور ہیں۔
انہوں نے عالمی برادری پر زور دیا کہ وہ کشمیری عوام پر کیے جانے والے جبر پر بھارت کا محاسبہ کرے۔اس موقع پر سفیر ممتاز زہرہ بلوچ نے کہا کہ پاکستان کے عوام ، حکومت ، پاکستانی اور کشمیری ہر سال یوم یکجہتی کشمیر مناتے ہیں تاکہ نہ صرف بھارت کے غیر قانونی زیر تسلط جموں و کشمیر کے لوگوں کے ساتھ اپنی محبت کی تجدید اور ان کے حق خودارادیت کے عزم کا اعادہ بھی کیا جا سکے۔ انہوں نے کہا کہ کشمیر کا مقدمہ مضبوط سیاسی، قانونی اور اخلاقی بنیادوں پر کھڑا ہے اور پاکستان کشمیری بھائیوں اور بہنوں کے منصفانہ مقصد کے حصول کے لیے ان کی مکمل سیاسی اور سفارتی حمایت جاری رکھے گا۔
سفیر نے کہا کہ بھارت کے غیر قانونی زیر تسلط جموں و کشمیر میں انسانی حقوق کی خلاف ورزیاں عالمی برادری کے ضمیر کے لیے ایک بڑا چیلنج بنی ہوئی ہیں اور مسئلہ کشمیر اقوام متحدہ کی سلامتی کونسل کی قراردادوں کے مطابق حل کیا جانا چاہیے۔سفیر نے کہا کہ کشمیریوں کی جدوجہد 1947 سے زندہ ہے اور رہے گی کیونکہ یہ کشمیریوں کے دلوں سے اٹھنے والی ایک منصفانہ جدوجہد تھی۔ انہوں نے فرانس میں مقیم پاکستانی اور کشمیری کمیونٹی کے کشمیر کاز کی حمایت میں ادا کیے گئے کردار کو بھی سراہا اور ان سے کہا کہ وہ اپنی آنے والی نسلوں کو کشمیر کی تاریخ اور کشمیریوں کی جدوجہد آزادی سے آگاہ کریں۔
