ماڈل یونائیٹڈ نیشنز انٹرنیشنل میں شرکت کرنے والے پاکستانی وفد کے ارکان نے پیرس میں پاکستان کے سفارتخانے کا دورہ کیا۔ دورہ کے دوران وفد نے ایک تعارفی اور تبادلہ خیال پر مبنی بریفنگ سیشن میں شرکت کی۔
اس موقع پر انہیں بین الاقوامی تنظیموں خصوصاً پیرس میں قائم اداروں میں پاکستان کی ترجیحات کے بارے میں آگاہ کیا گیا۔
شرکا سے خطاب کرتے ہوئے سفیر ممتاز زہرہ بلوچ نے کثیرالجہتی نظام، بین الاقوامی قانون، اور تنازعات کے پرامن حل کے لیے پاکستان کے عزم پر زور دیا۔ انہوں نے یونیسکو میں پاکستان کے تعمیری کردار پر بھی روشنی ڈالی بالخصوص 2023–2025 کے دوران ایگزیکٹو بورڈ کی نائب چیئر کے طور پر اپنی مدت میں پاکستان کے کردار اور ترقی پذیر ممالک کی ترجیحات کے فروغ کے لیے اس کی کاوشوں کے بارے میں آگاہ کیا۔
