جرمن شہر اشٹٹگارٹ کے قریب زیر تعمیر مسجد کے انہدام کا حکم
مسجد تعمیر کرنے والی مسلم تنظیم جنوبی جرمنی میں زیر تکمیل اس مسجد کو گرانے سے انکار کر رہی ہے، لیکن بلدیاتی انتظامیہ کا کہنا ہے کہ وہ اس انہدام کو یقینی بنانے کے لیے مقدمہ دائر کرے گی۔
جرمنی کی جنوب مغربی وفاقی ریاست باڈن ورٹمبرگ میں اشٹٹگارٹ کے قریب لائن فیلڈن ایشترڈنگن نامی قصبے کی بلدیاتی کونسل نے ایک تقریباً مکمل مسجد کے منہدم کر دیے جانے کا حکم جاری کر دیا ہے۔
سٹی کونسل نے اکثریتی ووٹ کے ذریعے فیصلہ کیا کہ کولون میں قائم اسلامی ثقافتی مراکز کی تنظیم، جو یہ مسجد تعمیر کر رہی ہے، اس سال کے اختتام تک اپنی لاگت پر مسجد کو گرا دے۔
اس تنظیم کو 2014 میں اس جرمن قصبے میں یہ مسجد تعمیر کرنے کی اجازت دی گئی تھی۔ تاہم اجازت کے ساتھ ہی یہ شرط بھی عائد کی گئی تھی کہ یہ تعمیر چار سال کے اندر اندر مکمل ہو جانا چاہیے، مگر متعلقہ اسلامی تنظیم ایسا نہ کر سکی۔
جب اسلامی ثقافتی مراکز کی تنظیم نے اس تعمیر کے حوالے سے معاہدے میں طے شدہ مدت سے تجاوز کیا، تو مقامی حکام نے اس کی تعمیراتی اجازت منسوخ کرنے کے لیے قانونی اقدامات کیے۔
کونسل نے نئی جگہ تلاش کرنے میں مدد دینے کا وعدہ کیا
اس تاخیر کے بعد ایک قانونی جنگ کا آغاز ہو گیا، جس میں وفاقی جرمن آئینی عدالت نے جنوری 2024 میں اس تنازعے میں قصبے کے بلدیاتی حکام کے حق میں فیصلہ دے دیا۔
جب مسئلے کے حل کے لیے مزید بات چیت ناکام رہی، تو میونسپل کونسل نے اس تاحال زیر تعمیر مسجد کو گرانے کا حکم دے دیا۔
اگرچہ بلدیاتی کونسل نے اسلامی ثقافتی مراکز کی تنظیم VIKZ کو کسی نئی جگہ پر مسجد کی تعمیر کے لیے مدد کی پیشکش بھی کی ہے، تاہم اس تنظیم کا کہنا ہے کہ وہ موجودہ زیر تکمیل مسجد کو نہیں گرائے گی۔
تنظیم کے ایک ترجمان نے ایک مقامی اخبار سے گفتگو کرتے ہوئے کہا، ”ہم اسلامی ثقافتی مراکز کی تنظیم لائن فیلڈن ایشترڈنگن کی اپنی مقامی شاخ کے فیصلے کے عین مطابق مسجد کے انہدام پر غور نہیں کر سکتے۔ ہم ایسا مطالبہ نہ مان سکتے ہیں اور نہ ہی اس پر عمل کریں گے۔‘‘
قصبے کے میئر اوٹو روپانر نے ایک مقامی اخبار کو بتایا کہ قصبے کی بلدیاتی کونسل صرف اصل معاہدے کی شرائط پر عمل کر رہی ہے اور اگر ضرورت پڑی تو وہ ’’یہ معاملہ عدالت میں لے جانے کو بھی تیار ہے۔
