فرانسیسی صدر ایمانوئل ماکروں نے نئے سال 2024 کو فرانس کے لیے امید اور افتخار سے عبارت کیا ہے۔ سال نو کے پیغام میں ان کا کہنا تھا، ’’کسی ایک صدی میں اولمپکس اور پیرالمپکس کی میزبانی بالکل ایسی ہی ہے، جیسے کسی کیتھیڈرل کی تعمیر نو۔
اتوار اکتیس دسمبر کی رات نئے سال کے لیے فرانسیسی قوم کے نام اپنے پیغام میں صدر ایمانوئل ماکروں کا کہنا تھا کہ نیا سال دو ہزار چوبیس اس لیے فرانسیسی فخر اور امید کا سال ہو گا کہ اس برس پیرس سرمائی اولمپکس مقابلوں کی میزبانی بھی کرے گا اور اسی برس ملکی دارالحکومت میں ہی نوٹرے ڈیم کیتھیڈرل بھی تزئین نو کے بعد دوبارہ کھولا جائے گا۔ پیرس کا یہ عظیم الشان کیتھیڈرل سن 2019 میں آتش زدگی سے بری طرح متاثر ہوا تھا۔
سال نو کا صدر ماکروں کا یہ خطاب ٹی وی پر نشر کیا گیا۔ تاہم نئے سال کے آغاز کے موقع پر پیرس میں دہشت گردانہ حملوں کے خطرات کے پیش نظر نوے ہزار پولیس اہلکار جب کہ پانچ ہزار فوجی بھی تعینات کیے گئے تھے۔
اس موقع پر ایمانوئل ماکروں نے کہا کہ جب بات فرانس کی سلامتی کی ہو گی، تو فرانس اپنے دفاع کو مضبوط کرنے کے لیے خود کو بھرپور انداز سے مسلح کرے گا، مگر ساتھ ہی تعلیم اور سماجی شعبے میں ترقی کا فروغ بھی جاری رہے گا۔
