بارسلونا(حمید چوہدری )سپین نیشنل پولیس نے نیشنلٹی کے لئے جعلی سرٹیفیکیٹس بنانے کے دھندے میں ملوث 36 افراد کو گرفتار کرلیاہے، پولیس کے مطابق 1667افراد نے سرٹیفیکٹس کے لئے ایک ہزار سے لے کر 45سو یورو تک کی رقم ادا کی ہے اور جعلی دھندے میں ملوث افراد نیشنلٹی کے لئے جعلی دستاویزات تیار کرنے کا کام کررہے تھے۔
رپورٹ کے مطابق ہسپانوی نیشنل پولیس اوربرطانوی نیشنل کرائم ایجنسی نے بیک وقت برطانیہ اور سپین میں کارروائی کرتے ہوئے متعدد افراد کو گرفتار کیا، برطانیہ میں کارروائی کے دوران گروہ کے اہم ترین رکن کی گرفتاری عمل میں آئی جبکہ زیادہ تر گرفتاریاں بارسلونا سے کی گئیں ہیں۔ بارسلونا میں کاروائی کے دوران 50 ہزار یورو نقد، 12 لیپ ٹاپس، اور سینکڑوں ڈپلومے ضبط کئے گئے۔پولیس حکام کے مطابق مجرمانہ سرگرمیوں میں ملوث افراد نے مبینہ طور پر 40 لاکھ یورو سے زائد رقم کمائی۔
پولیس نے انکشاف کیاہے کہ 1667 افراد میں سے 1380 افراد جعل سازی سے سپین نیشنلٹی سرٹیفیکیٹ دیلے ٹو حاصل کیا۔نومبر 2020 میں پولیس نے کاروائی کا آغاز کرتے ہوئے تفتیش شروع کی جس دوران دیلے ٹو کے جعلی سرٹیفیکیٹس میں ملوث 25 افراد کو حراست میں لیاگیا۔ ذرائع کے مطابق جعلی طریقہ کار سے سرٹیفیکیٹس حاصل کرنے والے متعدد پاکستانیوں سے پولیس تفتیش کرچکی ہے جس کے بعد متعدد افراد کو عدالت کے روبرو بھی پیش کیا گیا۔
