لالہ موسیٰ ( محمد کامران )سیکرٹری ایکسائز اینڈ ٹیکسیشن پنجاب وقاص علی محمود نے کہا ہے کہ ضلع گجرات کیلئے گندم خریداری کا 41فیصد ہدف حاصل کر لیا گیا ہے، کسانوں کو 1لاکھ65ہزار بوری کے قریب باردانہ جاری کیا جاچکا ہے، ان خیالات کا اظہار انہوں نے وزیر اعلی پنجاب سردار عثمان بزدار کی ہدایات کے مطابق گندم خریداری سنٹر لالہ موسیٰ کے دورہ، ڈی سی آفس میں اجلاس سے خطاب کرتے ہوئے کیا،ڈپٹی کمشنر سیف انور جپہ،ایڈیشنل ڈپٹی کمشنرز عامر شہزاد، افضل حیات تارڑ، ڈی او انڈسٹریز ڈاکٹر اکرام الحق، ڈی ایف سی نصراللہ ندیم و دیگر افسران بھی موجود تھے، انہوں نے رمضان بازار ظہور الہی اسٹیڈیم کا بھی دورہ کیا اور سبزیوں، پھلوں، دالوں، آٹا، گھی، چینی، چکن سمیت دیگر سٹالز کا معائنہ کیا۔ سیکرٹری ایکسائز اینڈ ٹیکسیشن پنجاب وقا ص علی محمود نے کہا کہ ضلع گجرات میں 20ہزار میٹرک ٹن گندم خریداری کیلئے گجرات، جلالپور جٹاں، منگوال، ڈنگہ، لالہ موسیٰ سنٹرز پر ابتک 8207میٹرک ٹن گندم خریدی جاچکی ہے، کسانوں کو 1800روپے فی من کے ریٹ پر بذریعہ چیک ادائیگی کی جارہی ہے، ابتک کل ہدف کا 82فیصد باردانہ جاری کیا جاچکا ہے۔ انہوں نے کہا کہ رمضان بازاروں میں 65روپے فی کلو کے ریٹ پر 372میٹرک ٹن سے زائد چینی فروخت کی جاچکی ہے جبکہ آٹا بھی وافر مقدار میں دستیاب ہے۔ سیکرٹری ایکسائز نے ہدایت کی کہ گرانفروشوں کے خلاف موثر کریک ڈاؤن جاری رکھا جائے۔ قبل ازیں ڈپٹی کمشنر سیف انور جپہ نے سیکرٹری ایکسائز اینڈ ٹیکسیشن پنجاب کو بریفنگ دی۔
